दसैँको टीकामा घर पुग्ने योजनासहित असोज २९ देखि सुरुङ खन्दै थिए कैदी

डोल्पा कारागारबाट सुरुङ खनेर फरार भएका आठजना कैदीबन्दीमध्ये प्रहरीले अहिलेसम्म ६ जनालाई पक्राउ गरिसकेको छ  । पक्राउ पर्नेमा दुई जनालाई जिल्ला प्रहरी कार्यालय रुकुम पश्चिम र चारजनालाई जिल्ला प्रहरी कार्यालय डोल्पाले नियन्त्रणमा लिएको हो । दुईजना अझै फरार छन् ।

कार्तिक १४ गते बिहान ६ बजे सुरुङ खनेर कारागारबाट फरार भएका उनीहरूले असोज २९ गतेदेखि नै भाग्ने योजना बनाएको खुलेको छ । दसैँको टीकाका दिन घर पुग्ने गरी उनीहरूले योजना बनाएको अनुसन्धानका क्रममा खुलेको जिल्ला प्रहरी कार्यालय डोल्पाका सूचना अधिकारी तथा प्रहरी निरीक्षक विनय सिंहले बाह्रखरीलाई जानकारी दिए ।

सूचना अधिकारी सिंहका अनुसार उनीहरूले कालीप्रसाद रोकायको नेतृत्वमा भाग्ने योजना बनाएको खुलेको छ । जबर्जस्ती करणी मुद्दामा कैद भुक्तान गरिरहेका रोकायलाई आठ वर्ष कैद सजाय तोकिएको थियो । उनको दुई वर्ष कैद भुक्तान गर्न बाँकी थियो ।

कारागारभित्र दिउँसो ३ बजेपछि भलिबल खेल्ने गरिएको र त्यही समयमा आवाज नआउने गरी सुरुङ खन्ने गरेको उनीहरूले बयानका क्रममा बताएका छन् ।