भारतीय बजारमा भीषण आगलागी, नेपाली दमकल टोलीले नियन्त्रणमा लियो आगो

भारतको उत्तर प्रदेशस्थित खिरी जिल्लाको वनगाउँ बजारमा भएको भीषण आगलागी नियन्त्रणमा नेपालबाट पुगेको दमकल टोलीले सहयोग गरेको छ । सीमावर्ती भारतीय बजारमा आगलागी भएपछि धनगढी उपमहानगरपालिकाको दमकल, नगर प्रहरी, सशस्त्र प्रहरी, नेपाल प्रहरी र स्थानीयको सहयोगमा आगो नियन्त्रणमा लिइएको थियो ।

लक्ष्मीपूजाका निम्ति बालिएका झिलिमिली बत्तीबाट विद्युत सर्ट भएर आगलागी भएको भारतको पलियाका स्थानीय पत्रकार शिशिर शुक्लाले जानकारी दिएका छन् । आगलागीबाट वनगाउँ बजारका करिब ६० पसल जलेर नष्ट भएको उनले बताए ।

नेपाली उपभोक्तालक्षित सञ्चालन गरिँदै आएको सीमावर्ती बजार हो त्यो । बजारबाट भारतको पलिया करिब ४० किलोमिटर टाढा पर्छ । भारतीय दमकल टोली घटनास्थल पुग्न समय लाग्ने भएकाले त्यहाँका स्थानीयले धनगढी उपमहानगरसँग सहयोग मागेका थिए ।

बेलुका करिब ६ः३० बजे आगलागीको सूचना पाएपछि धनगढी उपमहानगरपालिकाले तत्काल दमकलसहितको टोली परिचालन गरेको थियो । नगर प्रहरी, तीन दमकल र एउटा ब्याकुलोडरसहितको टोली बेलुका ७ बजे घटनास्थल पुगेको थियो ।

तीन दमकलमा तीन/तीनपटक पानी भरेर आगो निभाउने कार्य गरिएको थियो । । आगलागी थप फैलन नदिन ब्याकुलोडरको प्रयोग गरी फायर लाइन समेत बनाइएको थियो ।

नेपाली सुरक्षाकर्मी र स्थानीयको सहयोगमा आगलागी नियन्त्रणमा लिइएको धनगढी उपमहानगरपालिकाका मेयर गोपाल हमालले जानकारी दिए ।

लखिमपुर खिरी पलियाका भाजपा नेता रवि गुप्ताले मेयर हमाललाई आगलागीबारे जानकारी गराएका थिए । गुप्ताको जानकारीपछि धनगढीबाट दमकल टोली परिचालन गरिएको हो ।

राति करिब १२ः३० बजे आगलागी पूर्ण रूपमा नियन्त्रणमा लिइएपछि धनगढीबाट गएको दमकल टोली उपमहानगरपालिका कार्यालय फर्किएको मेयर हमालले जानकारी दिए ।