महेन्द्रनगरका दुई स्थानमा आकाशे पुल तयार, लक्ष्मीनियामा निर्माण जारी

धनुषा: धनुषाको महेन्द्रनगर बजारमा पैदल यात्रुको सुरक्षित आवागमनका लागि निर्माण गरिएका दुई वटा आकाशे पुल तयार भएका छन्। जनकपुरधाम–ढल्केवर छ लेन व्यापारिक सडकअन्तर्गत बनेका यी पुलमा अहिले अन्तिम चरणको रङरोगन तथा सौन्दर्यीकरणको काम भइरहेको छ। काम पूरा भएपछि पुल सर्वसाधारणका लागि खुला गरिनेछ।

क्षीरेश्वरनाथ नगरपालिका–५ मा पर्ने महेन्द्रनगर बजारमा निर्माण गरिएका यी पुल मधेश प्रदेशमै पहिलो हुन्। व्यस्त सडकमा पैदल यात्रुले सवारीसाधनको जोखिम मोलेर बाटो काट्नुपर्ने अवस्थालाई कम गर्ने उद्देश्यले पुल निर्माण गरिएको सडक डिभिजन कार्यालय मुजेलिया, जनकपुरधामले जनाएको छ।

सडकमा पैदल यात्रुको आवागमन बढी हुने क्षेत्रलाई लक्षित गर्दै महिला विकास चोक र सखुवा चोकमा एक–एक वटा तथा लक्ष्मीनिया गाउँपालिकामा अर्को पुल निर्माण गर्ने योजना बनाइएको थियो। तीनवटै पुलका लागि कुल करिब १० करोड ५० लाख रुपैयाँ लागत अनुमान गरिएको छ।

सडक डिभिजन कार्यालयका प्रमुख डिभिजनल इन्जिनियर दरोगाप्रसाद साहका अनुसार महेन्द्रनगरका दुवै पुलको निर्माण पूरा भइसकेको छ। लक्ष्मीनिया गाउँपालिकामा भने तेस्रो पुल निर्माणको काम जारी छ। उक्त पुल पनि मंसिर मसान्तसम्म सम्पन्न गर्ने लक्ष्य राखिएको उनले बताए।

आयोजनाअन्तर्गत महिला विकास चोकको पुल निर्माणका लागि ३ करोड ३५ लाख रुपैयाँ, सखुवा चोकको पुलका लागि ३ करोड ५७ लाख रुपैयाँ र लक्ष्मीनियाको पुलका लागि ३ करोड ४२ लाख रुपैयाँ विनियोजन गरिएको छ। यी लागत रकममा मूल्य अभिवृद्धि कर (भ्याट) समेत समावेश छ। तीनवटै पुल निर्माणको जिम्मेवारी दुई निर्माण कम्पनीले पाएका छन्।

सडक डिभिजन कार्यालयका साइट इन्जिनियर उज्ज्वल झाका अनुसार प्रत्येक आकाशे पुल ५ दशमलव ६ मिटर अग्लो, २९ दशमलव ४ मिटर लामो र ३ मिटर चौडा रहेको छ।

पुल सञ्चालनमा आएपछि पैदल यात्रुले सडक पार गर्न सवारीसाधनको बीचबाट बाटो खोज्नुपर्ने अवस्था कम हुने अपेक्षा गरिएको छ। यसबाट विशेषगरी व्यस्त समयमा पैदल यात्रुको आवागमन सुरक्षित बनाउन सहयोग पुग्नेछ।

जिल्ला ट्राफिक प्रहरी कार्यालय धनुषाका प्रमुख प्रहरी निरीक्षक सूर्यबहादुर शाहीले आकाशे पुल सञ्चालनमा आएपछि सडक दुर्घटनाको जोखिम घट्ने बताए। पूर्व–पश्चिम राजमार्ग हुँदै जनकपुरधाम प्रवेश गर्ने प्रमुख सडक भएकाले यस क्षेत्रमा दैनिक सयौँ पैदल यात्रुको आवतजावत हुने गरेको उनको भनाइ छ।

स्थानीय शम्भुप्रसाद यादवका अनुसार महिला विकास चोक र सखुवा चोक वरपर हाटबजार, शैक्षिक संस्था तथा बस्ती रहेकाले सडक पार गर्न सर्वसाधारणले लामो समयदेखि जोखिम सामना गर्दै आएका थिए।

क्षीरेश्वरनाथ बहुमुखी क्याम्पसका प्राचार्यसमेत रहेका यादवले पुल सञ्चालनमा आएपछि विद्यार्थी, बालबालिका र ज्येष्ठ नागरिकलाई सडक वारपार गर्न सहज हुने विश्वास व्यक्त गरे।

महेन्द्रनगरका दुई पुल निर्माण सम्पन्न भएसँगै स्थानीयले सुरक्षित आवागमनको सुविधा पाउने अपेक्षा गरेका छन्। अब लक्ष्मीनियामा निर्माण भइरहेको तेस्रो पुल पनि निर्धारित समयभित्र सम्पन्न भए यस सडकखण्डका थप पैदल यात्रुलाई सहज र सुरक्षित रूपमा आवतजावत गर्न सहयोग पुग्नेछ।