पोखरा ३० रनले पराजित, चितवन तेस्रो स्थानमा उक्लियो

 चितवन राइनोजले नेपाल प्रिमियर लिग (एनपीएल) को तेस्रो सिजनमा पोखरा एभेन्जर्सलाई ३० रनले पराजित गरेको छ ।

यो जितसँगै चितवन तेस्रो स्थानमा उक्लिएको छ । पाँच अंक बनाएको चितवनले चार खेल खेल्दा दुई जित र एक हार व्यहोरेको छ । टोलीको एक खेल भने वर्षाका कारण रद्द भएको थियो ।

शुक्रबार कीर्तिपुरस्थित त्रिवि क्रिकेट रंगशालामा चितवनले प्रस्तुत गरेको १५२ रनको लक्ष्य पछ्याएको पोखराले १९ ओभरमा सबै विकेट गुमाएर १२१ रन मात्र बनाउनसक्यो ।

पोखरालाई सस्तैमा समेट्न रिजन ढकालले चार विकेट लिए । उनले चार ओभर बलिङ गर्दा २४ रन खर्चिए । कमलसिंह ऐरीले तीन विकेट लिए । त्यसैगरी, डान मुस्ले, मौसम ढकाल र कुशल मल्लले समान एक विकेट लिए ।